រុស្សី៖ វិមានក្រឹមឡាំង នៃរដ្ឋាភិបាលរុស្សីបានបញ្ជាក់នៅថ្ងៃទី២៥ ខែឧសភានេះថា សេវាសន្តិសុខរបស់រុស្ស៊ីដឹងពីអ្វីដែលពួកគេបាននិងកំពុងធ្វើហើយ បន្ទាប់ពីមន្ត្រីចារកម្មកំពូលអ៊ុយក្រែនបាននិយាយថាប្រធានាធិបតី វ្ល៉ាឌីមៀ ពូទីន (Vladimir Putin) គឺជាបុគ្គលដែលស្ថិតនៅលេខរៀងទីមួយនៃបញ្ជីដែលត្រូវធ្វើឃាតដោយរដ្ឋាភិបាលទីក្រុងគៀវ (Kyiv)។ 

លោក Vadym Skibitsky អនុប្រធានសេវាចារកម្មយោធាអ៊ុយក្រែនបានប្រាប់កាសែត Die Welt របស់អាល្លឺម៉ង់ក្នុងបទសម្ភាសន៍មួយថា ទីក្រុង Kyiv ចង់ធ្វើឃាតលោកពូទីន ត្បិតលោកគឺជាបុគ្គលកំពូលដែលជាអ្នកទទួលខុសត្រូវ ជាអ្នករៀបចំ និងជាអ្នកសម្រេចទៅលើរឿងរ៉ាវសង្គ្រាមដែលកំពុងកើតមានបច្ចុប្បន្ននេះ។ ដកស្រង់សម្តីមួយឃ្លា លោក Skibitsky ថ្លែងថា៖ "នៅទីបំផុត! អ្នកប្រព្រឹត្តបែបណា នឹងត្រូវទទួលនូវអ្វីដែលខ្លួនប្រព្រឹត្តនោះ"។ លោក Skibitsky បន្ថែមថា លោក Putin កំពុងកត់សម្គាល់ថា យើងកំពុងតែខិតទៅជិតគាត់ម្តងបន្តិចៗហើយ មិនត្រឹមតែប៉ុណ្ណោះគាត់កំពុងភ័យខ្លាចថានឹងអាចត្រូវធ្វើឃាតដោយពលរដ្ឋរុស្សីខ្លួនឯងផងដែរ។ 

ក្រៅពីលោក Putin ដែលជាបុគ្គលទីមួយដែលស្ថិតក្នុងគោលដៅ លោក Skibitsky ក៏បានលើកឡើងពីបុគ្គលមួយចំនួនទៀតផងដែររួមមាន លោក Yevgeny Prigozhin មេទាហ៊ានស៊ីឈ្នួល, រដ្ឋមន្ត្រីការពារជាតិរុស្ស៊ី លោក Sergei Shoigu, ប្រធានអគ្គសេនាធិការ លោក Valery Gerasimov និងមេបញ្ជាការយោធា លោក Sergei Surovikin សុទ្ធតែជាបុគ្គលដែលស្ថិតក្នុងគោលដៅតាមប្រមាញ់របស់អ៊ុយក្រែន។ លោកបន្តថា លោក Putin គឺជាគោលដៅដែលលំបាក ដោយសារកន្លងមកលោកពុំសូវបង្ហាញមុខ ប៉ុន្តែមួយរយៈចុងក្រោយនេះ លោក Putin ហាក់បង្ហាញវត្តមានជាសាធារណៈញឹកញាប់ជាងធម្មតា។ 

ដោយឡែក បន្ទាប់ពីមានការលើកឡើងរបស់អនុប្រធានសេវាចារកម្មយោធាអ៊ុយក្រែនយ៉ាងដូច្នេះហើយ នៅក្នុងកិច្ចសម្ភាសន៍មួយជាមួយទូរទស្សន៍រដ្ឋរុស្សីដែលបានសួរថា តើវិធានការដើម្បីការពារលោកពូទីនកំពុងត្រូវបានបង្កើនឬទេក្រោយការលើកឡើងពីផែនការធ្វើឃាតនេះ? អ្នកនាំពាក្យវិមានក្រឹមឡាំងលោក Dmitry Peskov ឆ្លើយតបថា "ជឿខ្ញុំចុះ! ក្រុមសេវាសន្តិសុខរបស់យើងដឹងពីការងាររបស់ពួកគេ និងដឹងពីអ្វីដែលពួកគេកំពុងធ្វើហើយ"។ 

លោក Peskov បាននិយាយថា កិច្ចសម្ភាសន៍របស់ Skibitsky គឺជាការបញ្ជាក់ថារុស្ស៊ីពិតជាមានការសម្រេចចិត្តបានត្រឹមត្រូវក្នុងការចាប់ផ្តើមនូវអ្វីដែលខ្លួនហៅថា "ប្រតិបត្តិការយោធាពិសេស" ទៅលើអ៊ុយក្រែនកាលពី ១៥ខែមុន។ កន្លងមក វិមានក្រឹមឡាំងធ្លាប់បានពណ៌៌នាការវាយប្រហារដោយយន្តហោះគ្មានមនុស្សបើកកាលពីដើមខែឧសភានេះ ថាជាការប៉ុនប៉ងរបស់អ៊ុយក្រែនដើម្បីសម្លាប់លោកពូទីន ប៉ុន្តែទីក្រុងគៀវបានបដិសេធនូវការលើកឡើងរបស់រុស្សីនៅពេលនោះ។ ដោយឡែក កាសែត The New York Times បានចុះផ្សាយថា ទីភ្នាក់ងារស៊ើបការណ៍សម្ងាត់អាមេរិកជឿថា ការវាយប្រហារដោយយន្តហោះគ្មានមនុស្សបើកទៅលើវិមានក្រឹមឡាំងរបស់រុស្សី ទំនងជារៀបចំឡើងដោយក្រុមចារកម្មពិសេស ឬចារកម្មយោធារបស់អ៊ុយក្រែន៕